(( بسم الله الرحمن الرحيم ))
< مهمة مستحيلة في جامعة البنات >
أترككم مع القصة
بدأت قصتي عندما دخل صديقي المعاق فكرياً ( بدر الشوق ) في عالم الحب ..ذلك العالم الغامض الذي لا ينيره أي مصباح حتى لو اقتربت الشمس نفسها من ظلمته فلن تنير إلا جزء يسير لا يسمح بمن كان بصره مثل بصر زرقاء اليمامة أن يرى ما يجول في داخله .. فكيف بحالنا ونحن نعاني من ضعف في النظر رغم أكلنا لكميات كبيرة من الجزر ..
لقد حضر إلي وهو يروي لي قصة حبه المشئومة وعن ظروف صديقته التي لا يستطيع رؤيتها فحارت نفسه النتنة لتسول له بأن يزور شهادتي ثانوية باسمي وأسمه ويقدمها لجامعة الملك سعود التابعة للفتيات لنكون أحد منسوبيها كي يستطيع أن يحقق رغبته وأن يرى حبه الذي نمى مع كثرة المكالمات وشحن البطاقات ( والله يا فيه ناس رهنت بطاقات الأحوال ) ..فقد ألبسني ملابس نسائية وأزال شعر جسدي بالنير لأصبح وكأنني دجاجة نزع ريشها ... لأشترط عليه والغضب يشتعل في خلايا جسدي بأن ألبس اللون الأحمر ولكنه نهاني وقال بأن إدارة الجامعة تمنع الملابس ذات الألوان الفاقعة والجذابة وأننا سوف نمر من خلال بوابات التفتيش والتي تحمل الأرقام التالية : ( 2، 5 ، 4 ، 7 ) ..وهناك سننال كماً من التوبيخ غير البصاق في حالة المخالفة..لا أريد أن أطيل عليكم في الحديث وسأدعكم مع هذه القصة التي سأسردها لكم باللهجة العامية بعد أن تفصلوا الاشتراكات
* * *
(( البـــدايـــة ))
وقفنا عند باب الجامعة بعد ما نزلنا خوينا وحنا لابسين عبايات مخصرة وأنا أقول يا ( بدر الشوق ) أنا خايف .. قالي جمد قلبك يا ( أبو هديب ) .. قلت أحس بألم .. وهو يقول لا تخلي الألم يدخل قلبك .. قلت الألم مهوب في قلبي الألم في رجلي من ضيق الجزمة.. قال أسمها شوكه مهوب جزمة لا تفضحنا .. قلت شكلك جايع وش شوكته تنهد وهو يقول تحمل وعشان تتناسى الوجع تخيل أنك تتطيول عشان تطل من ورى جدار على سكن أمريكيات وهم يسبحون .. قلت أبو الإقناع اللي تعرفه .. تنهد وهو يقول وش تبيني أسوي فيك ..طنشته وتقدمت خطوة وأنا أترنح .. وهو يمسكني ويقول زبط مشيتك كذا بيقولون جايه سكرانة .. قلت ولا يهمك أبصرفهم وأقولهم أني شاربه بور هاورس منتهي تاريخه وسبب لي مشاكل في الأرحام .. نغزني بكوعه وهو يقول يا ( شهيرة ) وقفته وقلت منهي ( شهيرة ) قالي أنت يا ( أبو هديب ) أسمك ( شهيرة ) قلت لا ياخوي أسم ( شهيرة ) قريب من كلمة فطيرة أبي أسم زي الناس قالي مافيه مجال نغيره مكتوب في الاوراق كذا .. قلت طيب وأنت وش اسمك قالي وهو يسبل بعيونه اللي ملطسه كحل أسمي ( ياره ) قلت نفس الشي قريب من كلمة ( بياره ) أنا أحسن منك..
دخلنا من بوابة رقم ( 2 ) ولقينا شؤون الطالبات يفتشون وعتقنا منهم بشق الأنفس .. وحنا نمشي متجهين لمبنى (24 )قسم التربية الخاصة في الجامعة وحنا نمشي نقزقز هالبنات اللي يضحكون وكل ثلاث مع بعض وهم يتوجهون مجموعات للقاعات وأنا أناظر الجدول وأقول وش علينا هالحين قالي ( بدر الشوق ) علينا مادة ( سلم ) وحنا نمشي وقفت وأنا أقول مومعقول التنورة ضيقة أحس بتصلب في شرايين رجليني كذا بتجيني غرغرينا لو أستمر الوضع كذا .. مسكني ( بدر الشوق ) وهو يقول وش فيك مطير التنورة إلى نصف صدرك نزلها شوي طالع كنك هندي لابس وزار .. قلت طيب وهو يمسكني بسرعه خلنا نلحق على المحاضرة .. مشيت بالحسرة كأني طفلة فيها كساح وأنا أقول وحنا نمشي.. قلت مهوب مشكلة وأنا أأشر وأقول هذي القاعة رقم ( ) .
دخلنا وجلسنا على الكراسي وقلت من اللي أدرسنا .. قالي الدكتورة ( حليمة ) قلت معقولة ( حليمة بولند) ادرس في الجامعة هذي .. قالي هي قديمة من سنة 1405هـ موجودة ومعها دكتوراه وماستر من مصر بس خلك ساكت لا تلفت الانتباه وحنا جالسين دخلت وحده فيها غررو وشوفة نفس وكأنها بتستفرغ من نفسها وأنا اتمتم وين ( حليمة ) تأخرت ودي آخذ منها توقيع بعد المحاضرة .. نغزني وهو يقول ( حليمة ) قدامك المدرسة السودانية اللي دخلت .. قلت معقولة هذي ( حليمة ) هذا تزوير في أسامي الدلع كيف يجي هالأسم الزين على بقايا عظام الضبعة اللي قدامي .. وأنا أعلق سمعتني اللي جنبي وقامت تضحك وهي تقول شكلك فله ومنسمه .. قلت بحيا ليش شايفتهم حاطين راسي في برميل موية ويشوفون من وين التنسيم .. أضحكت ونشخف قلبي وهي تقول معك ( هدى ) وش رايك نتواعد بعد المحاضرة في البوفيه .. قلت مهوب مشكلة لو تبين نتواعد في الصناعية ... و( بدر الشوق ) جنبي يقول بصوت واطي اجل في الصناعية تسمع بالحب
7
7
يتبع
--------------------------------------------------------------------------------
خلصت المحاضرة بشق الأنفس وستهلكنا فيها كمية كبيرة من السعابيل والسبة النوم الغلط .
طلعنا من المحاضرة مصابين بآلام في الظهر وتنمل في الرجلين وأنا أقول لـ ( بدر الشوق ) وين البوفيه قالي في بمنى ( 12 ) قلت طيب خلنا نروح البنت مواعدتنا هناك ... قالي طيب شف أنا أبخليك معها في البوفيه وبحاول أقابل خويتي قلت مهوب مشكلة وحنا نمشي قلت ثواني تكفى شوي وقف أحس بأن الكلون نزل ( يعني الشراب للناطقين بغير اللهجة النسائية) وقفت ورفعت التنورة شوي وجلست اضبط الكلون وما نتبهت لوحده كانت تشوفني ثمن جتني وهي تقول عفوا قلت مرحبا .. قالت خويتي تبغى تتعرف عليك .. قلت مهوب مشكلة خليها تجي نتشرف والله .. شوي راحت ورجعت مع خويتها وأنا لاهي أزبط الشراب هالبايخ اللي بدون مغاط كل شوي يطيح وأنا ازبط سمعت صوت غريب قريب من صوت أحتكاك الأشجار في بعضها إذا هبت رياح شمالية رفعت راسي وأشوف هذيك البنت السوداء الخاله اللي تقول لليل وخر وأنا أجي مكانك مدة يدها وهي تقول السلام عليكم سلمت عليها وأنا مندهش وهي تقول أنا أسمي ( شروق ) ابتسمت وأنا أقول غريبه مع العلم أن وجهك يوحي بالغروب ابتسمت السوداء ( شروق ) وهي تقول مقبولة منك يا عسل قلت آمري قالت معليش بس أنا شفتك وأعجبت فيك وحابة أتعرف عليك وتكونين صديقة لي خاصة .. قلت لها آسفة أنا من زمان بطلت أقتني الحيوانات وثاني شي أنا مش بتاعة الحركات هذي أني أكون لك الحنان والدلع..
ابتسمت ( شروق ) وهي تدلع بس قلبي تعلق فيك .. صرخت في وجهها من زين قلبك هاللي كنه مكينة كرسيدا .. وبعدين سوري أسمحيلي ما أقدر أنا أسوي الحركات هذي ألزم ما علي سمعتي بكره يجي واحد يخطبني ويدري أني وقفت وتكلمت معك ممكن يغير رايه فيني كيف لو سويت معك علاقة اسمحيلي .. مدة يدها ( شروق ) وهي تصافحني وتقول طيب ممكن أطلب طلب أخير قلت ليش أنت بتموتين .. قالت لا بس أتمنى تكتبين لي إهداء على يدي بخطك وتكتبين أول حرف من أسمك بعد .. قلت مافيه مشكلة معك طامس عشان أكتب .. قالت معي قلم قلت هاتي بس أخاف ما يبين على بشرتك هالبايخه.. أخذت القلم وجلست أكتب لمدة عشر دقايق وهي تسولف مع اللي جنبها وأنا أكتب قلت خلصت .. ناظرت ( شروق ) وجلست تقرى بصوت عالي وهي تقول ( عاش ابو رايش ، ابو هاجوس مرعب النفوس ، ياروحي ياشارع Xl ، الرجاء عدم المرور الطريق مغلق للصيانة بين قوسين فندق الوحدة ) سكتت ( شروق ) شوي ثمن قالت وش هذا قلبتي يدي جدار مدرسة وبعدين وش تقصدين بكلمة بين قوسين ( فندق الوحدة ) قلت وأنا أبتسم مدري وش معناها بس أشوف الشباب دائما يكتبون كذا على براميل الزبايل ( فندق النصر ، فندق الهلال ) قلت اكتب هالكلمة في المكان المناسب وما لقيت أنسب من يدك عشان أكتبها بعدها رحت وخليتها واتجهت للبوفيه وجلست على الطاولة وأنا أشوف البنات يروحون ويجون ومتجمعات مع بعض اللي كاش وغنية ، واللي فقيرة ومنزوية على حالها ، واللي تستهبل وتضحك بصوت عالي ( يعنني منسمة ) واللي حامل ويا الله تشيل نفسها ..
وأنا جالس على الطاولة مستمتع بالريحة المعفنة حقت البوفيه جاني ( بدر الشوق ) وجلس معي وهو يقول شف اتصلت عليها تقولي بتخلص وبتجي للبوفيه بس أتمنى ما تقوم معي انتظرني هنا قلت ليش خلني أشوف هالجمال اللي مسحبنا عشانه للجامعة وأنا أسولف جت ( هدى ) البنت اللي كانت جنبي في المحاضرة ومعها شلتها وابتسمت في وجهي وهي تقول ممكن نجلس معكم .. قلت وقلبي يخفق أجلسي على الكراسي وأن ما كفت الكراسي مستعد أتعلم السحر وأسحر زميلتي ( ياره ) عشان أحولها لك كرسي أنا قلت أسم ( ياره ) طاحوا البنات ضحك وهم يقولون لـ ( بدر الشوق ) بالله أسمك ( ياره ) ثمن ألتفتت البنت وهي تقولي وأنت وش أسمك قلت أنا أسمي ( شهيرة ) ويدلعوني ( أم هديب ) أنا قلت كذا على طول طاحوا ضحك ووحده منهم تقول وش هالاسامي أسامي لبنانيين .. قلت وأنا ألعب بخصلة من خصلات شعري إيه الوالده جدها لبناني عشان كذا نعود لبنانيين من عائلة الأطرش .. قالت وحده منهم غريبة مع أن أشباهك أشباه يمنية طاقها الجوع .. ابتسمت وأنا أقول قصدك عشان بشرتي لا اللي مخرب بشرتي هو لأننا نسافر كثير لليمن وأنت تعرفين اللي يسافر لليمن ويشرب من موية النيل حقهم لازم يرجع لهم شوي جاني كوع من ( بدر الشوق ) وهو يقول وش نيلةالنيل في اليمن نعنبو خيرك ما درست جغرافيا ..
قلت من زين هالجغرافيا اللي درسنها كلها عن طقس المملكة من الأبتدائي الين الجامعة والطقس ما تغير هو هو .. جلسوا البنات وهم يضحكون ووحده منهم تقولي أنت تحفه هبال دمك خفيف ممكن أتعرف عليك وإذا ما عندك مانع تكونين من شلتي .. قلت أنا في الخدمة مستعدة لو تبين تتبنيني وإلا تسكنيني في غرفة السواق حقكم ما عندي مشكلة .. أضحكت وهي تقول خلاص أجل بس اعملي حسابك ترى البنات يجتمعون عند الشيخة في القصر وهي تحب الضحك .. وأنا أبعرفك عليها بتنبسط عليك .. دق جوال ( بدر الشوق ) ثمن قال بصوت ناعم عن أذنكم مواعده وحدة وأن شاء الله أخلص وأجي قلت مهوب مشكلة بس لا تتأخرين قام وخلاني معهم ووجهي يحرقني من النير ووحده من البنات تقول وهي تأشر علي أنا أبروح أجيب شي نشربه أنت وش تحبين تشربين .. قلت وأنا متحمس علي الطلاق محد يجيب الطلابات غيري .. وقفوا البنات يناظروني وهم مستغربين واستوعبت أني دمرت المسألة كلها ثمن قلت الله يلعن أخوي علمني هالكلمة وعلقت في لساني .. ابتسموا ووحده منهم تقول تحفه .. تحفه جنان هالبنت .. قلت معليش وش أسمك من اليوم تقولين تحفه تحفه ... شكل تخصصك أثار ومرسلينك الإدارة تقنعيني عشان يحطوني في متحف الجامعة .. هنا البنت أنسدحت على الطاولة وغطت وجهها وهي ميته ضحك .. قلت يا جماعة شوفوا خويتكم ليكون جاها هبوط وداخلت في غيبوبه ..
رفعت راسها وهي تضحك وتقول خلاص خلاص ... قلت وأنا مرتبك عن إذنكم أبروح أجيب لكم شي تشربونه وتاكلونه وش تبون قالت وحده يا حسره وش عندهم غير الكفي والكرواسون قلت حلو نعمه ثمن رحت للبوفيه وأنا أمشي اسمع سواليف البنات في الجلسات .. بنات يتكلمون في الميك أب وفي اللبس وبنات يحشون في الدكاتره وفي مبنى المعلمات رقم ( 15 ) وبنات يتكلمون عن سوء الزفلته الداخليه بين المباني وعن كمية الحصى اللي تكسر الجزم والرجلين وفيه بنت تأشر علي وهي تقول شوفوا جسمها كيف شكله طالعه كأنها غسالة بابطين ووحدة جالسه على الكرسي حابسه دمعتها وهي تكلم بالجول وتقول معليش يا قلبي يا ( مشعل ) صدقني كنت في المحاضرة ما قدرت أرد عليك صدقني ما صكيتها في وجهك عمد كنت في محاضرة .. أرجوك لا تزعل وهو شكله يهزئها ومستقوي عليها وهي حابسه عبرتها والمنديل في يدها متفط ومتلوي وحالته حاله وتمسح عبرتها وتسوي أن عينها داخل فيها شعرة عشان محد ينتبه .. جيت عندها وقلت معليش أختي ترى سمعتك وأتمنى ما تضنين انه تطفل مني لكن أبقولك شي ترى اللي خلقه خلق غيره واللي ما يحس فيك وفي دموعك ما يستاهل أنك تذرفين له دمعة وأبيك تعرفين شي ثاني ترى فيه نوعية من الرجال يستمتع لما يشوف البنت تصيح وتبكي يحس أنها ملكه .. عشان كذا شوتيه وأكثر ما كثر الله الرجال اللي يحسون ولو تبين رقمي خذيه .. ناظرتني بعين ثمن استوعبت الموقف وقلت وأنا مرتبك سوري أخذني الحماس وترى أمزح معك بس صدقيني خذيها كلمة اللي ما يحس فيك لا تحسين فيه أبد ابتسمت لي وقالت شكرا ..
7
7
7
7
7
7
نشوووفكم الحلقة الجاااية ان شالله
تحيــــــــ ولوووعة الدلوووعة ـــــــــيتيــ للكل
هذه الرسالة تفيد بأنك غير مشترك في منتديات سارق القلوب. لتسجيل الرجاء اضغط هنـا 
28-2-1428, 01:13 صباحاً
< مهمة مستحيلة في جامعة البنات >شباب دخلوا جامعة البنات تتوقعون وش صار 
العرض العادي
