نسايم حب ( قصة قطرية )

الجزء الثـــــــالث عشـــــر :






فهده اللي كانت قاعدة على الكرسي قدام التواليت وتسمع سولف ريم عن سوق واقف.... ما انتبهت لناصر اللي دخل وحط العلبة اللي في يده على الكرسي بسرعة .... ما انتبهت لا وهو واقف ورآها على طول ومدنق على رأسها يبوسه وهو يلم عليها بيديه الثنتين ... و يقول بصوت هامس في أذنها : مساء الحب يا روح قلبي ..... فهده اللي استوى وجها احمر من الإحراج يوم شافته في المنظرة قدامها .... وزاد إحراجها يوم دنق عليها قدام البنات ولمها ... أرفعت أيدها بسرعة عشان تفك يده عنها ..... بس بمجرد ما أسمعت صوته يهمس قرب أذنها شيء ما أفهمته جاتها نفس الحالة اللي جاتها العصر ..... تخدرت ولا حست بناصر اللي اخذ أيديها اللي أرفعتهم تدف بهم أذراعه بين أيديه وهو يشد عليها في أللمه .... كانت تحس أنها وسط فراغ .... ما هب قادرة تفكر في شيء أو تحس بشيء .... مثل اللي في غيبوبة .. بس غيبوبة تدوخ أحاسيسها .. ولا اطلعت من ذا الغيبوبة ألا على صوت ريم اللي كانت تقول : عمي الله يخليك ... افتح العلبة ذا الحين ... أرفعت فهده عينها تشوف ناصر اللي بعد ما فكها لف يوقف قدامها وهو متكي على طرف التواليت و ماسك أيدها في أيده ... و يقول لريم : أنتي وش ذا اللقافة اللي فيس ؟؟؟؟ عفاري طلعي اختس برى قبل اذبحها ترها كلت مخي بذا الحنة .... قال آخر جملة وهو يجود يد فهده بقوة بين أيدنه يوم حاولت تجرها منه .... عفراء اللي كانت واقفة وهي حاسة بإحراج من عمها وخالتها خاصة بعد ما أفهمت تلميح عمها قالت لريم وهي تجرها من يدها : ريموه يلا عشان نبدل ونصلي وبعدين نجهز العشا للمعاريس ... ولا تنسين تدقين على مريوم وموضي تعلمينهم عن العلبة اللي جابه عمي ... خليه فضول جماعي ذا الليل ..... فهده كانت عارفه أن ناصر أول ما يسمع الباب يتسكر وراء البنات بيدف يدها عشان كذا ما حاولت تجرها مره ثانية وهي تشوف البنات يطلعون ويسكرون الباب ورآهم ... لفت تشوف ناصر عشان يفك يدها بسرعة خاصة بعد ما أرخى يده عليهم .... لقته فاتح كفوف يدها الصغيرة و حاطهم بين كفوف أيديه الكبيرة ويشوفهم بتمعن ... شدتها نظرته لكفوف يدها ونزلت عينها تشوف يدها وش فيها .... ويوم ما شافت فيهم شيء ...أرفعت عينها لناصر بنظرة استفسار .... لقته يبتسم وهو يشوفها بنظرة غريبة وقال : سبحان الله ... أحلى يد شفتها في حياتي .... وضحك ناصر بقوة وطلع من الغرفة يوم شاف فهده كيف صار وجها احمر وجرت يدها بسرعة من أيديه وهي مرتبكة .................................................. .......
























فهده كانت رافعه كفوف يدها وهي تشوفهم .... أيدي حلوه ؟؟؟؟؟؟؟ بس يدي عاديه وصغيرة ... ليه اجل يقول أحلى يد شافها في حياته ؟؟؟؟؟؟؟؟؟ يتمقت علي ؟؟؟؟؟ يمكن ؟؟؟؟ ليه لا ؟؟؟؟ أيه ... والدليل انه ضحك بعد ما قال كذا ... عاد ذا الحين هو اللي يده ما يحتاج ... ما غير مصاويط هريس ... وش كبرهم ....يا الغبية .... يبي يرد لس ألحكي اللي قلتيه له إيه .... وما لقا غير يديس يعيب عليهم ؟؟؟ صدق سخيف ذا البرج .... ما عليس منه خليه عنس ... وقامت فهده عشان تروح تقعد مع البنات لأنها صدق تحس بملل .... وهي ماره جنب الكرسي لفتت نظرها العلبة البيضة والشريط الأحمر اللي ملفوفة به ... قربت منها .... أمسكت طرف الشريطة تحسس عليها وهي تفكر وش ممكن يكون في ذا العلبة ... بس أول ما أسمعت صوت ناصر في الممر أبعدت عن العلبة والكرسي بكبره ورجعت عند التواليت تسوي نفسها تأخذ شيء ....دخل ناصر وهو يتكلم في الجوال .... دخل وقعد على الكرسي اللي جنب كرسي العلبة .... أسمعته فهده يقول : حياك اقلط في المجلس وأنا ذا الحين بجيك ... فهده قالت في خاطرها فكه ... ومشت بتروح للبنات بس أول ما مرت من جنب ناصر مسك يدها يوقفها وهو يتكلم في الجوال ... فهده لفت عليه بسرعة وهي تشوفه بنظرة غضب .. أشارة فك يدي وهي تسحب يدها ... بس ناصر سفها وهو يقول : فهده الله يرضى عليس أمري لنا بالعشا في المجلس ... الحجي حمد بيتعشا عندنا ... وفك يدها بسرعة ورجع يكمل حكيه مع حمد في الجوال ...
فهده اللي طلعت بسرعة كانت فيها حرة بس ما تدري ليه .... أمري لنا بعشا ... من ذا الحين يتأمر ... الله يرحم أيام الطباخ ... والله عشان خاطر حمد بقولهم عن العشا ولا هو ما يستأهل ......أول ما أدخلت المطبخ الداخل عشان تنادي سونيا لقت عفراء في المطبخ ومرتبه صينية عشا توب ... ابتسمت فهده وقالت : عفاري وش ذا الزين ... الله يعطيس العافية بس من اللي قال لس تجهزين العشا ؟؟؟؟؟ لفت عفراء على خالتها وقالت : الله يعافيس .. بس أنتي وش اللي جايبس المطبخ ؟؟؟ أنتي عروس ... اقعدي وحطي رجل على رجل وحنا نخدمس بعيونا .... فهده اللي كانت تشوف عفراء بنظرات كلها حنان وهي تقول في خاطرها ... آآآآآآآآه يا عفاري لو تدرين أني من عصر احوس في المطبخ ....مدت يدها تلمس خد عفراء وباست الخد الثاني وهي تقول جعلني قبلس يا عفاري .... جلعني اخدمس عروس ... قولي آمين .... آميـــــــــــــــــــــن ... كان هذا صوت ناصر اللي واقف على باب المطبخ وهو يشوفهم ويبتسم ..... عفراء حست بخجل بعد ما شافت عمها ولفت تعابل الصينية ... أما فهده فا لفت تشوف عفراء بعد ما حست بنغزه في صدرها وهي تشوف ناصر يبتسم .... ناصر دخل ووقف جنب فهده و مسك خصرها بيده و بعد ما شاف الصينية ... بسرعة رفع يد فهده بيده الثانية وباسها بكل رقه وحنان وهو يقول : الله يسلمها لي يا رب على ذا العشا المرتب .... فهده اللي كانت ترتجف من حركات ناصر اللي تحرجها قدام البنات جرت يدها بسرعة من يده و دفت يده عن خصرها وهي تتحرك عشان تخلي عفراء توقف بينهم وقالت بصوت يرتجف : هذي يد عفاري ما هي بيدي ... ناصر اللي كان يحس برجفت فهده بين أيديه قال وهو يشوفها باستهزاء ويلف على عفراء ويبوس يدها : بعدي والله على عفاري ... أول واحد يجيني يخطبس راعي رنج اسود ... اوعدس أني جوزس أيه ...
عفراء اللي كانت تدري أن عمها يضحك معها قالت : بس لا تنسى لازم يكون اسمه الدكتور راشد ...
ناصر وهو يطلع من المطبخ وعينه على فهده اللي مازالت ترجف بقوة قال : والله مشكله البدو ما ينعطون وجه .... حنا زين نلقى راعي رنج ... وين نجيب لس دكتور ... طرشوا علينا عشا ... خلى الحجي يتعشى .... من مغرب وأنا مواعده بالعشا .... فهده اللي كانت ما ترجف بجسمها بس ... كانت تحس أن كل نبض فيها يرجف ..... قليل أدب .... بيتم طول عمره قليل أدب ... ما يستحي على وجهه بوس رأس و يدين ومشيتها له..... لكن لمات وأحضان ....هذا اللي ما ينسكت عليها ... لا يسوي احسب للبنات ولا غير البنات ... صدق ما تجي المايله ألا من قل العدله .... ولا واحد مثل ذا وين يعرف العيب والمنقود .... لكن الغلط ما هب غلطه .... الغلط غلطي أنا اللي وافقت على واحد برج ..... فهده أتبهت على يد عفراء اللي تهز كتفها وهي تشوفها بخوف وتقول : خالتي ... وش فيس بردانا ؟؟؟؟؟؟ ليه ترتجفين كذا ؟؟؟؟؟؟؟؟؟؟؟؟؟؟؟؟؟ فهده انتبهت لنفسها وقالت : شوي تدرين ما هب متعلمة البس فساتين ربع يد .... عفراء هزت رأسها وقالت وهي تبتسم : ما عليه ... بس من اليوم و رايح لازم تتعودين أنتي عروس ولا عندس حد غريب في البيت ولا رجاجيل غير عمي ... وعمي رجلس ... يعني البسي وتمتع بشبابس ذا اللي دافنته تحت القلابية والجلال .... وعلى طاري رجلس ... من الحجي اللي عمي يبي ذا الصينية لها ؟؟؟؟ أنا مجهزتها لكم عشان تتعشون في غرفتكم ؟؟؟؟؟؟؟؟؟
فهده في ذا اللحظة كان ودها تروح وتحب خشم حمد اللي حرمها شرف العشا المزعج مع عمه ... لفت عشان تروح تشوف ريم وقالت : حبيبتي عفاري ... أنا ما اقدر أكل وانتووا ما هب معي ... ولا تفكرين في يوم أن ذا بيصير ... والعشا لولد عمس حمد وعمس بيأكل معه ... لا تزعلين ... تراه مكتوب له من يوم دخلتي المطبخ ... عفراء ابتسمت وهي تشوف فهده تطلع من المطبخ .... وقفت تتأمل الصينية بابتسامتها ..... يعني هو مواعد عمي ... و عمي هو اللي كلمه في السوق .... ازعل ؟؟؟ ليه ازعل ؟؟؟ يجعله والله بالعافية على قلبه .................................................



























فهده بعد ما تعشت مع البنات .... أقعدت في غرفة ريم اللي استغلت فرصة وجود فهده معها وجابت تلفون الصالة واتصلت على موضي وهي حاطته على الاسبيكر .... عشان يضحكون على تعليقات موضي أذا عرفت عن العلبة ....أما عفراء اللي كانت رايحه عشان تقفل باب المطبخ بعد ما اطلعت سونيا .... شافت عمها يدخل وهي بتركب الدرج ... أنزلت عشان تقفل باب الصالة ورآه ......
ناصر ضحك وقال : خايفه حد يخطفني ؟؟؟؟؟؟؟؟؟؟
أضحكت عفراء وقالت : الصراحة أنت ينخاف عليك ...شباب وزين .. واصل وفصل .... عشان كذا حنا قلنا لازم نقفل البيبان عليك ... تدري الحرص واجب .... ابتسم ناصر وهو يلم على عفراء ويبوس رأسها ويقول : تصدقن أنتي اللي رافعه معنوياتي في ذا البيت .....أقطعته عفراء وقالت : آفااااااااااااااا... ليه ؟؟؟ وفهوده وين راحت ؟؟؟
ناصر ابتسم وقال بنظرة شرير وهو يفرك أيديه في بعض مثل شرشبيل : في غرفة النوم .... باروح اسنفر بحياتها ... أضحكت عفراء بصوت عالي لأنها تخيلت خالتها سنفوره وعمها شرشبيل وقالت وهي تمسك يده قبل لا يدخل باب الممر : ما هب في غرفة النوم على قولتك ... في غرفة بابا سنفور فوق ..... وجرت يده عشان يركب معها ... بس ناصر وقفها وقال : لا عفاري ما هب عدله اركب فوق ....
عفراء أفتحت عينها وقالت : عمي وش اللي ما هب عدله تركب فوق ... أول كنت تقول عشان خالتكم ما قدر ادخل ولا اركب ....وحتى بعد ما صارت أمرتك ... بعد قلت عيب اركب وحنا ما بعد أعرسنا..... قطعها ناصر وقال وهو يتعير : أنا ؟؟؟ متى قلت عيب ؟؟؟؟ ما اخبر أني استحي ....عفراء ردت عليه وهي تقرص عينها وقالت وهي تجره عشان يركب : الله يرحم أيام العيش ........




























موضي : يعني وش كبرها ؟؟؟؟؟؟؟؟؟؟؟
ريم : يعني قد أيدس كاملة أذا مديتها .... بس ما هب مكتوب عليها شيء ... بس علبة بيضة مربوطة بشريطه حمره ستان .... شكلها مغري الصراحة .....
موضي قالت وهي معصبة : وأنتي ذا الحين سهلتيها مع وجهس ؟؟؟؟ عنود الصيد اخلصي علينا ... وش الهدية ؟؟؟ وش اللي في العلبة ؟؟؟؟؟ أكيد أن العلم بين ضلوعس ......
فهده اللي كانت مندمجة مع موضي وتفكر في حكي يحرها انسدحت على بطنها فوق سرير ريم عشان تقرب من الجهاز بدون ما تشوف ناصر اللي أدخلت قبله عفراء وأشرت لها أنها تسكت وقالت بكل دلع : والله وش اقولس ؟؟؟؟ هو شيء أكيد أني ادري ... لان حبيبي وحياتي نصوري ما يخش عني شيء ... لكن أنا وعدته أني ما اعلم حد ... وخصوصا أنتي .... وسكتت فهده وهي تحط يدها على ثمها عشان ما تسمع موضي ضحكها وهي تسمعها تقول : يااااااااااااااااااااااااااااااااااااااااو ... ليه يوم ما تعلموني ؟؟؟ ليه ؟؟؟ وش ذا اللي انتووا خاشينه عني ؟؟؟؟؟ علميني ولا اركب السيارة واجيس ذا الحين .... فهده ردت عليها وهي تقاوم الضحك : ما اقدر يا أختي ما اقدر .... أنتي عزيزة وغالية ... بس هو أغلا منس ... اسمحيلي ... ما اقدر .... وسكتت فهده بعد ما صرع قلبها ناصر اللي قعد فجأة قدامها على السرير وهو يقول لموضي : وإذا في أبوس خير تعالي الليلة بيتنا .... فهده اللي كانت منسدحه على بطنها قامت بسرعة تعدل قعدتها بعد ما شافت عين ناصر وهو يتكلم على جيب فستانها الواسع .... موضي قالت بسرعة بعد ما أسمعت صوت عمها : هلا ... هلا والله ... بشيخ الرجاجيل ... جعلني فداك والله .... جعلني قبلك ... ما يرضيك ما ارقد اليوم وألا ارقد ويصير فيني شيء .. تتيتم بنتي ... علمني وش في العلبة .... ناصر رد عليها وهو يشوف فهده كيف قامت بسرعة واطلعت من الغرفة : آفاااااااا والله عليس ... بنتس تتيتم وأنا حي ... لا والله حشا ... أذا متي أن شاء الله بجيبها أربيها عندي هنا ... وإذا أسالت عنس.... بعطيها العلبة البيضة أم شريطه حمره تلعب فيها .......























فهده أدخلت غرفة النوم وهي تركض ... وطرم أن شاء الله ... ما حلا لس تضحكين على موضي ألا وهو يسمع ... يمكن ما سمع ؟؟؟ لا سمع ...طرم .. يطرمس قولي يا لله ... ذا الحين وش بيقول ؟؟؟ بيقول ذي ميتة علي ...يهبي ألا هو ... ماتت عليه كوبر.... بس صدق قليل أدب ... أربع وعشرين ساعة ذا العين مبحلق بها في كل شيء ... يا مال البط أن شاء الله ... ولفت تشوف نفسها في المنظرة حقت التواليت ... وأنتي وش عندس دارعة بذا الفستان ؟؟؟؟ افصخيه .. ابرك لس ...............




















ناصر بعد ما حرق قلب موضي ولا علمها وش في العلبة ... قعد مع البنات شوي ونزل .... بعد ما وصل نص الدرج قعد على الدرجة و سحب تنهيده قويه من صدره وهو يتخيل كيف كانت فهده منسدح على بطنها فوق سرير ريم وهي رافعه سيقانها وتحركهم في الهوى ... وكيف كانت تتحاكا بدلع .... واسمه ... أول مره يسمع اسمه من ثمها ..حط يده على خده وهو فاتح ثمه بابتسامة عبيطة وهو يذكر كيف كانت تقول ... حبيبي وحياتي نصوري .. آآآآآآآآآآآه يا قلبي .... امحق خطط ...تبي تذوبها في عواطفك ؟؟؟؟ هي اللي ذوبت طوايفك كلهم ما هب أنت بس .... حلالها ... كل اللي تسويه فيني حلال ... المهم في النهاية أوصل للي أبيه .... الله يلعن أبو الصبر يا شيخ.... تنهد وهو يقوم ... قم.... قم ... خل عنك اللي تبيه ما يجي غير بالتخطيط والتكتيك ..................................


























فهده اللي بدلت فستانها وألبست قلابية بيت جيببها ضيق واجد بالعاني بعد ما طفت الليت انسدحت على السرير وتلحفت وهي ماسكه الريموت حق التلفزيون وتفرفر بس وهي كاتمه الصوت لان ما لها خلق تسمع شيء ..... كانت تفرفر بيدها وعينها على العلبة .... صدق هي وش فيها ؟؟؟؟ الله يغربلس يا موضي عاديتيني بفضولس ...... أول ما أسمعت صوت الباب حق الغرفة ينفتح رجعت عينها على التلفزيون بسرعة .... دخل ناصر وفتح ليت الغرفة .... بعد ما فصخ غترته وحطها على الكرسي ... وقف قدام التواليت بس بدون ما يشوف فهده أو يلف عليها أو يحاكيها ... نزل الازره وفصخ الساعة وهو يدندن أغنية يا بعد هالدنيا ليه ..... فهده غصب عنها أرفعت عينها تشوفه وهو يدندن ... والله ما هب هين البرج صوته حلو بعد ... سبحان الله الظاهر الحبال الصوتية عنده على مقاس طوله ..... ناصر اللي كان يطلع بوكه ويحطه على التواليت لمح بطرف عينه فهده تشوفه .... كان يبي يضحك على القلابية اللي لابستها بس مسك نفسه عشان ما يخرب على نفسه المخطط ولف عشان يدخل غرفة الملابس وقفته فهده يوم قالت : باكر باروح ... وقف ناصر ولف يتسند على الباب وهو يقول باستهزاء : بتروحين وين أن شاء الله ؟؟؟؟؟؟؟؟؟؟؟ فهده اللي كانت تبي تحاكيه عن الحركات السخيفة اللي يسويها قدام البنات تراجعت في آخر لحظة لا يقول أنها تحجج مثل سالفة العيال وقررت تشاوره في روحتها لبيت خالد باكر ردت عليه وقالت : بروح بيت خالد أنا والبنات نسلم على منيرة ونسكر البيت و أجيب البنات هنا ... ناصر كان يشوف التلفزيون وهي تتحاكا ورد عليها بدون ما يشوفها بكل برود : وبشور من بتروحين ؟؟؟؟؟ فهده قرصت عينها فيه وهي تقول : هذا أنا أشاورك .... ناصر اللي ما زال يشوف التلفزيون هز كتفه وهو يقول : هذا ما هب مشاور هذا تبليغ ...... فهده اللي كانت عارفة هو وش يبي أخذت نفس عميق وقالت له وهي تشوفها كيف سافها : ممكن أروح بيت خالد باكر ؟؟؟؟؟
لف ناصر عليها ووقف يشوفها لحظات بنظرة حالمة وقال : أنتي ما تشاوريني .... أنتي تأمريني ... ابتسم وهو يشوف نظرة الصدمة في عين فهده ولف ودخل غرفة الملابس وسكر الباب ...
فهده اللي كانت تشوف الباب وهي تفكر في اللي قاله .... هذا إنسان غير طبيعي .... في عرقين في رأسه ما هب راكبين على بعض ... أكيد .......... ناصر بعد ما طلع من الحمام راح سيده للعلبة وهو يشوف فهده اللي من شافته طالع بالفانيلة والسروال وهي مدنقه رأسها وتسوي نفسها تقرا اللي مكتوب على الريموت .... اخذ العلبة وجاء وقعد على طرف السرير وهو يدندن نفس الأغنية .... فهده من شافته قعد على طرف السرير شدت الملحف كله عليها بقوة .... وهي تشوفه بنظرات كلها شك وخوف ..... بس ناصر لا شافها ولا رفع عينه فيها ... حط العلبة على السرير وقام يفتحها بكل هدوء وهو يدري أن فهده معه على الخط وتشوفه بكل تركيز ...... كان يدندن الأغنية بصوت عذب وناعم وهو يجر شريطة العلبة ... ويفتح غطى العلبة ويحطه جنب العلبة بس بدون ما يشوف فهده اللي تتبعه النظر بكل فضول العالم خاصة بعد هذي الرقة في فتح العلبة وهذي الأغنية ... رفع الورق الشفاف الأبيض اللي مغطي الهدية بكل بطئ .... عشان يثير فضولها .... وعشان يمشي الأغنية مع الإحداث ..... عند مقطع .... لك حبيب يموت فيك حس به الله يهديـــــــــــك طلع ورده جورية ناعمة وحالمة بأوراقها الزاهية والرقيقة وغصنها الطويل.... رفعها يشوفها وهو يغني لها ...هو منشغل باله عليك وأنت ما فكرت فيـــــــه .... كنك الماي لضماه وفرحته ولمسة شفــــــــاه ..... وأنت حلمه في الحياة وأنت كل اللي يبيـــــــه... وبعد هذا المقطع باس الوردة بنعومة وقال بصوت هامس ...يا بعد هالدنيا ليه ...ومد يده بالوردة وحطها على الوسادة الخالية جنب وسادة فهده ..... وهو يشوف فهده كيف تشوف الوردة بدهشة وهي فوق الوسادة .... قام بسرعة واخذ العلبة وطلع وسكر الباب بهدء ورآه ........... فهده كانت تشوف الوردة بدهشة وكلمات الأغنية اللي قالها ناصر ترن في رأسها .... فجأة حست برجفة في كل جسمها .... مدت يدها تلمس الوردة بطرف أصابعها .... وأول ما مسكت أوراق الوردة بيدها نزلت دمعه من عينها ... حستها دمعه باردة وحنونة ... دمعة رضا ... ما فكرت في اللي سواه ناصر ولا القصد من اللي سواه ... ولا هي ليه تبكي ... ولا هي ليه تحس بالرضا والراحة ... كل اللي سوته أنها انسدحت على مخدتها تشوف الوردة المحطوطة على الوسادة اللي جنبها كنها طفل جايته أغلى هدية وخايف يغمض عينه عنها تختفي ...............................































أول ما دخلت الكيك في الفرن وهي كاشفه نقابه حست أن في حد عند الباب نزلت نقابها وسكرت باب الفرن ولفت عشان تشوف من اللي عند الباب ..... كان نويصر واقف وهو يشوفها ويبتسم بمكر وفجأة قال بصوت عالي وهو يحرك يده كأنه حيوان بيهجم على فريسته : وخووووووووووووووووووو
فهده كشت وهي تشوفه يسوي كذا ورجعت خطوه على وراء ...... دخل المطبخ وقال وهو يقرب منها : أنتي وش عندس .... وين ما رحتي بذا النقاب .... وقام يشر بيده يمين ويسار وهو يقلد صوت فهده ويقول : يعني ادرو أني مزيونه ..... أقص أيدي أن ما كنتي خفسة ......
ردت عليه فهده بصوت مهزوز وقالت : وخفسة الخفس بعد ... وش تبي ؟؟؟؟؟؟؟؟؟؟؟؟؟؟؟؟
نويصر قام يبوزم وقال : لالالا ما يصير كذا نظلمس بدون دليل .... لازم أتأكد بنفسي من كل شيء .... اخف تطلعين ملكة جمال شبة الجزيرة وحنا ما ندري ....قال جملته الأخيرة وهو يقرب منها بسرعة ويمسك طرف نقابها عشان يرفعه .... فهده حطت يدها على نقابها عشان ما يرفعه .... ورجعت على وره بقوة خلتها تضرب في درج المطبخ وهي تشوف نويصر كيف كان يشوفها بنفس النظرات ... نفس نظراته المخيفة ..... نويصر اللي قرب أكثر منها وهو مدنق ... رفع رأسه يحط عينه في عينها .... عزوز .لالالالالالالالالالالالالالالالالالالالالالالالال الالالا .... عزوز و نويصر هم واحد ...... مد يديه وحده على نقابها وجره ووحده على جلالها وجره ..... فهده كانت تبكي وترتجف وهي تحاول أنها تدفه بس ما أقدرت ..... فجأة ابتعد عنها وقال : أنتي ليه تبكين ؟؟؟؟؟؟؟؟؟؟؟... لا تبكين أنا ما سويت لس شيء ... أنتي ليه تسوين كذا ؟؟؟؟؟؟ حرام أنا ما سويت شيء .... وقرب منها وحط يده على كتفها وهو يمسح دموعها بيده الثانية .... لما هدت فهده واعرفت انه ناصر اللي تعرفه ما هب عزوز ... ابتسم ناصر لها وقال وهو يضغط على كتفها بقوة : ذا الحين خلي نقابس ينفعس ...... فهده اللي ما فهمت وش اللي كان يقصده ناصر لفت تشوف يده اللي أوجعتها ..... أصرخت بأعلى صوتها وهي تشوف كتفها تحت يده عاري .... حط يده على ثمها عشان تسكت وقال بنظرات كلها حقد وكره : لا تظنين أني نسيت اللي سوتيه فيني ..لا ما نسيت ولا عمري بأنسى ..اكرهس .... اكرهس ... وكره كل شيء فيس ....... فهده الصدمة خلتها تفتح عينها على الآخر وهي تبكي .... اختفى كل شيء من قدامها .... بعد فترة قدرت تعرف أنها في غرفتها بس ناصر ما كان موجود ...... أمسحت دموعها اللي كانت تسيل على خدها بصمت ..... لفت على الساعة شافتها ... كانت الساعة أربع الفجر ... باقي ساعة على الصلاة .... ما أقدرت ترجع ترقد بعد ذا الحلم ... كانت تحس أن قلبها مقبوض ولا هي بعارفه ليه .... اطلعت من الغرفة ... وأركبت للبنات تشوفهم وتطمن عليهم .... لقت البنات راقدين .... أنزلت وهي بتدخل غرفة النوم لفت على غرفة السوني .... يمكن هو فيه شيء ؟؟؟؟ لا هذا وش بيجيه ؟؟؟ ما يندرا بالدنيا .... مشت فهده بتردد لغرفة السوني ... وقفت قدام الباب المسكر تسمع إذا كان واعي ولا راقد ... يوم ما أسمعت صوت ... أفتحت الباب شوي شوي ... الليت كان مسكر بس التلفزيون و السوني شغال ... وناصر راقد وهند السوني في يده .... خلني اسكر الكهربا لا يضربه شوط وهو راقد ويحترق البيت بسبايبه .... أدخلت فهده بسرعة وسكرت الكهربا ... وطلعت وسكرت الباب ورآها ... فهده بعد ما رجعت غرفتها ... راحت توضت وصلت لها ركعتين .... بعدها راحت تتمدد على السرير ... شافت الوردة اللي طاحت تحت الوسادة .... أخذتها وشمتها ... هو ليه سوى كذا ؟؟؟؟ وش كان يقصد بذا الحركة ؟؟؟؟ يقصد يبين للكل انه الرجال الكريم اللي ما يقصر في العروس ... بس وردة .... والله توقعت كل شيء ألا انه يجيب وردة ..... وردة ....بس يا ترى رجال يجيب وردة هدية ويقدمها بالطريقة اللي قدمها .... ممكن في يوم من الأيام انه ينسى الإساءة والظلم ويسامح ؟؟؟؟؟؟؟؟؟؟

























فهده اللي ظلت سهرانا إلى أذان الفجر... أول ما صلت أرقدت بسرعة عشان ما تشوف ناصر إلى رجع من المسجد... كتفت بشوفته يوم دخل عشان يتوضأ ويلبس ... دخل وطلع ولا كأنه يشوفها ... ولا كأنه سوى شيء و لا قدم لها شيء ..... قامت الصبح على منبه الجوال اللي ضابطته على الساعة سبع .... راحت مع سونيا تنظف غرفة حمد عشان يقعد فيها محمد وترتب غرفتها اللي فوق عشان تقعد فيها مريوم وبكذا تكون قريبة من أخوها إذا بغى شيء وفي نفس الوقت يكون بعيد عن غرف البنات ..... الساعة ثمان ونص راحت توعي البنات .... وبعدين تذكرت ناصر انه راقد في غرفة السوني خافت أن وحده من البنات تدخل وتشوفه راقد هناك .... راحت عشان توعيه .... بس أول ما أدخلت غرفة النوم لقته قام من زمان وشكله متسبح وخالص ... لأنه كان واقف بسروال و فانيلة عند التواليت وهو يمشط شعره المبلول .... فهده دنقت على طول في الأرض وهي تقول : السلام عليكم ...
ناصر إلي كان سرحان لف عليها يشوفها وهو يبتسم وقال : وعليكم السلام ورحمة الله .... وش ذا النشاط اليوم ؟؟؟؟ فهده اليوم كان لها مزاج أنها تتحاكا مع أي حد عشان كذا قالت لها وهي رايحه للكبت تطلع لها لبس : قمت عشان أجهز غرفة لمحمد وغرفة لمريوم ... قطعها ناصر وهو يحط المشط على التواليت بقوة وقال : وش الغرفة اللي بتحطين محمد فيها ؟؟؟؟؟؟؟؟؟؟؟؟؟؟؟ فهده لفت تشوفه بعد حركة المشط ورجعت تشوف الكبت وهي تقول : غرفة حمد .... ناصر قال بصوت هادي وأمر في نفس الوقت عشان ينهي الموضوع : ما فيه محمد بيقعد في الملحق ... البيت فيه بنات ولا يجوز يقعد معهم .... فهده ما استحملت بعد ما حرها بحكيه لفت عليه وهي في يدها تنورتها وقالت : حرام عليك هذا بزر وبعدين غرفة حمد بعيده عن غرف البنات .. يعني حتى ما هب كاشفهم .... ناصر اللي راح يقعد على الكرسي قال بكل برود وهو يشوف فهده كيف احتدت في ألحكي : بس الدرج في صالة البنات يعني ممكن يشوفهم في الركوب والنزول ... وأنا ما ابغي أحط الحطب جنب الضو وقول سهلات .... وابتسم باستهزاء وهو يكمل : وبعدين إذا ما تبينه يقعد في الملحق عشانه بزر ... لا تحاتين ما هب أول بزر يسكن في ذا الملحق .... فهده بعد ما أسمعت ألحكي اللي قاله ناصر حست ألحكي على لسانها جمد ولا أقدرت تفتح ثمها بكلمه ... لفت على طول ... رجعت التنورة مكانها وسكرت الكبت واطلعت من الغرفة عشان تشوف البنات أو الأصح تشرد من نظرات ناصر لها بعد ألحكي اللي قاله ... وهي عند باب الممر أسمعت ناصر يقول : فهده الفطور ........................
ناصر أول ما طلع لقا صينية الفطور تنطره في الصالة .... تريق وطلع عشان يروح بيت خالد لأنه هو اللي بيوديهم المطار .... أما فهده اللي كانت منخشه في المطبخ لأنها ما تبي تواجه ناصر... كانت تسرق النظر له وهو يفطر ... ما هب ناسي ... عمره ما هب ناسي ..... انطرته إلى أن راح وبعدها راحت عشان تبدل ... وراحت في سيارة البيت السوبر مع البنات تسلم على منيرة وتجيب البنات وخدامتهم معها بعد ما تقفل البيت .................................................. ................
































فهده أول ما دخلت سيارتهم بيت خالد وشافت سيارة ناصر واقفة قدمهم حست بحزن غريب .... انزلوا البنات ونزلت معهم .... شافت ناصر قاعد في الصالة وهو يضحك مع حمد .... قالت : السلام عليكم ....حمد فز بسرعة وقال : هلا وعليكم السلام حيا الله مرت العم ... كيف حالس اربس طيبة ؟؟؟؟؟؟ فهده ردت وهي توخر عن الباب عشان البنات يدخلون : طيبة طاب حالك ......حمد أول ما شاف البنات ورآها قال وهو يروح المجلس الداخلي بس بدون ما يلف عليهم : كيف حالكم يا بنات ؟؟؟؟ البنات ردوا عليه السلام وهم رايحين غرفة مريوم .... فهده حطت شنطتها على الكرسي ومشت بتروح حق منيرة داخل تشوفها .... بس وهي تتجنب النظر لناصر اللي كان قاعد ... أول ما جات بتدخل الممر حست بشيء شد عبايتها من جنب .... لفت بلهفه ما تعرف مصدرها عشان تشوف اللي يشدها وهي تحاول تسيطر على دقات قلبها ... كانت شجرة الزينة اللي جنب الممر .... انصدمت فهده من نفسها أكثر من صدمتها بالشجرة يوم لفت على الكرسي اللي كان قاعد عليه ناصر ولا لقته .... من كنتي تتوقعين ؟؟؟؟ تتوقعينه هو ؟؟؟؟ لا ما كنت أتوقع حد ؟؟؟؟ اجل ليه لفيتي وأنتي متشفقه ؟؟؟؟؟؟؟؟؟ وليه احزنتي انه ما كان هو ؟؟؟؟؟؟ ما كنت متشفقه ولا أحزنت انه ما كان هو بس ما توقعت حد يسوي ذا الحركات السخيفة ألا هو ....... ولفت فهده تكمل طريقها بدون ما تشوف ناصر اللي كان قاعد في المجلس الداخلي وهو يشوفها ....... بعد ما راحت منيرة وحمد مع ناصر ومحمد المطار ... وموضي راحت هي وبنتها ..... فهده شلت البنات وأغراضهم وأغراض محمد معهم وقفلت البيت ... وروحت بهم ....................



























فهده بعد ما أدخلت مع البنات راحت تفصخ عبأتها في غرفتها وصلت الظهر .... وركبت للبنات بسرعة .... لقتهم قاعدين في الصالة كلهم .... ومشغلين لمها سبيس تون عشانها كانت تبكي ..... لمت مها في حظنها وقعدت تسكتها وتوعدها بالطلعات الحلوة ... وجنغل زون .... وبعد ما هدت مها أقعدت تسولف مع البنات ... ما أقدرت تتحاكا عن موضوع الغرف وهي ما تدري إذا كان ناصر صادق في حكيه ولا لا ؟؟؟؟؟؟ اقعدوا ينطرون ناصر ومحمد على الغدا إلى الساعة وحده وثلث .... ناصر ركب للبنات فوق بعد ما دور فهده ولا لقاها تحت .... مها أول ما شافت ناصر نطت من حضن فهده وراحت لناصر اللي شلها بسرعة وقعد يلعب معها .... وجا وهو شالها عشان يقعد جنب فهده وهو يدنق على رأسها ويقول : مسس بالخير ..... فهده اللي شبوا خدوده من الإحراج قالت : مسك بالنور ... سافروا الله يحفظهم .... ناصر شاف ساعته وقال : من عشر دقايق طيارتهم طارت .... ولف على البنات وقال : عفاري ... ريموه ... ولد عمكم .... تحت لا تنزل وحده فيكم ألا وهي متغطية .... لا تحرجون الصبي ... خلكم طول ما انتووا تحت متغطين ... واللي ما تبي تتغطى لا تنزل تحت ... هو بيرقد في الملحق ...بس قعدته واكله معنا هنا ... ريم قالت بملل : عمي ما يصير نقعد طول اليوم بالعباية ؟؟؟؟؟
ناصر قال : ما هب لازم عباية البسي قلابية واسعة وستيره وجلال ... والجديد بالنسبة لس نقاب .... ريم قالت بسرعة : وش .؟؟؟؟؟؟؟؟؟؟ وش اللي البس نقاب في البيت ؟؟؟؟؟؟؟؟؟؟؟؟؟.....وسكتت بعد ما شافت نظرة ناصر الحادة لها وقالت : أن شاء الله .... بس ما عندي نقاب .... فهده اللي عجبها موقف ناصر مع ريم قالت بسرعة وهي توقف : أنا عندي بروح أجيب لس .... وقفها ناصر يوم جرها من كمر تنورتها وقعدها وهو يقول : انثبري أنتي .... ذا الحين بنستر البزر ... وأنتي رايحه تركضين بذا المخصر .... وكمل بعد ما شاف البنات يضحكون على الموقف : استريحي أخاف يشوفس الصبي ويتولع فيس ... وش أسوي بعمري أنا ذيك الساعة ؟؟؟؟ اذبحه وهو عندي أمانة ؟؟؟؟؟؟؟؟؟؟؟؟؟؟؟؟























فهده بعد ما أحرجها ناصر قدام البنات كان ودها تخنقه من قريب ..ما هب أنت اللي بتعلمني الستر ذا الحين ..صدق يحر .. وزادت حرت فهده يوم قال لعفراء تروح تجيب لها عباية وشيله ونقاب من عندها عشان تنزل تنكب لهم الغدا لان محمد قاعد في الصالة تحت ... بس ما قدرت أنها تقول شيء لان البنات فسروا تصرفه على انه غيره عليها ما هب تحكم فيها ... ومشت السالفة عشان خاطر البنات وحمد ذا اللي قاعد تحت جويع .... بعد الغدا فهده أخذت مها تنيمها عندها لأنها متعودة تقيل ....ناصر دخل على فهده وهي لامه مها وشوي وترقد هي بعد معها .... يوم أرفعت فهده رأسها لها ... قال لها بهمس : أرقدت ؟؟؟؟؟ فهده أرفعت رأسها تطل في وجه مها ورجعت تشوفه وهي تأشر برأسها أشارة نعم .... ولمت مها لصدرها بقوة وهي تشوف ناصر جاي يقعد على طرف السرير وهو يقول : زين خلها ترتاح عشان العصر بنوديها تلعب .... فهده ارتاحت من حكي ناصر وأرخت يدها على مها وهي تقول : جزاك الله خير ... خلها تونس ... أنا كنت احاتيها عشان العصر بيجونا نسوان وأخاف تتملل .... قطعها ناصر وهو يقول : وش اللي بيجون العصر نسوان ؟؟؟؟ العصر بنوديها أنا وأنتي ....وهذا آخر كلام ... ولف عشان يقوم بس وقف وهو يبتسم بعد ما سمع فهده تناديه : ناصر ولف عليها بعد ما مسح ابتسامته وقال : خير ؟؟؟؟؟؟ قالت فهده وهي تحاول تفهمه : اسمعني بس هم لوهم ما هب غرب كان قلت ما عليه بس والله أني استحي أرد مره كبيره جايه تبارك لي ... واردها وش أقول لها ؟؟؟ لا تجون بطلع ؟؟؟؟ والله استحي .... ناصر اللي كان يقرص عينه فيها قال : من ذا اللي بتجيس ؟؟؟؟؟ ردت عليه فهده : عمت موضي ... نسيبتكم ........ناصر قال وهو يقوم يوقف : أني داري أن السالفة فيها موضي .... ما فيه بتروحين معي ....فهده اللي كانت ناويه تمسك الضيوف على العشا حبة تهدي ناصر وتكسر خاطره لا يفضحا ... يسويها ويدق على موضي يكنسل الزيارة ... قالت : أرجوك ... أنت ما ترضي ما نحشم الضيف في بيتك ... ويوم شافت ناصر سفها وراح للباب عشان يطلع قالت بسرعة : جعلني قبلك ما تفشلني فيهم .... وسكتت فهده وهي منصدمة يوم قال ناصر وهو يقطعها بعد ما لف عليها : أنا اللي جعلني قبلس ... وعطاها بوسه في الهوى وطلع بسرعة وسكر الباب ..... فهده بعد ما استوعبت الموقف ما أقدرت ألا أنها تبتسم وترجع رأسها على الوسادة ........



















راح ناصر العصر يودي مها تلعب وراحوا معه محمد ومريم وريم ... أما عفراء تمت مع خالتها يستقبلون الضيوف .... جات أم تركي مع موضي وجمله وحماتهم الصغير نورة .....لأنها أعجبتها القعدة مع البنات يوم العرس والصباحية وخاصة عفراء .... عشان كذا أقعدت تسولف معها طول الوقت .... قبل صلاة العشا أم تركي قامت عشان تروح حاولت معها فهده تقعد على العشا وحلفت عليها بس أم تركي تعذرت لها أن بيجونها نسوان بعد الصلاة ولازم تروح .... راحت معه جملة ونورة بس موضي قررت أنها تقعد تتعشى وتخلي سعود يمر عليها فليل ... ولان كان في رأسها حب ما بعد طحن طرشت بنتها مع عمتها البيت ..... بعد ما راحوا النسوان أفتحت فهده الهدايا اللي جابوها لها أم تركي وجملة بعد إصرار موضي اللي تبي تشوف أي أحسن هديتهم ولا هديتها .... استلمت فهده في أم تركي اللي كانت جايبه لها عقد صغير وناعم ... وجملة اللي جابت لها ساعة ...وبعدها أفتحت هدية موضي وهي تشوفها تشاور عفراء .... أفتحت فهده عينها وهي تشوف الهدية ... أرفعت رأسها تشوف موضي وهي تقرص عينها فيها وقالت : مويضي وش ذا ؟؟؟؟؟؟؟؟ موضي قالت : سويرات ما اعجوبس ؟؟؟؟ فهده ردت عليها وهي ترفع الاسويرات قالت : الله يغنيس .. بس وين ألبسهم ما يدخلون في يدي ألبسهم في أصبعي ؟؟؟؟؟؟؟؟؟؟؟؟؟ موضي قالت وهي تطلع علبة خاتم من شنطتها وتقول : اصبري ذا العلبة لس ... بس الاسويرات هذي سماوه .... وكملت يوم شافت فهده فاتحه حلقها : لا تفتحين ثمس لي ... سماوت بنتس اللي بتسمونها علي .... فهده ما أقدرت تقاوم الضحك رغم غرابة الفكرة وقالت وهي تضحك : تشوفين بطني قدامي ؟؟؟؟ يا الخبل لا وبعد عرفتي أنها بنت ؟؟؟؟زين يمكن ما أجيب بنات .. ما أجيب ألا عيال ... موضي قامت تأشر برأسها لفهده عشان تصبر وقالت بصوت واطي عشان عفراء ما تسمع : اصبري أنا بعلمس كيف يجبون بنات ... ولفت على عفراء بسرعة وقالت لها : عفاري حبيبتي روحي صلي ابرك لس تره أذن من شوي ..... عفراء قامت وهي تضحك على موضي .... وطلعت .... أول ما اطلعت لقت عمها والبنات في الصالة بس محمد ما هب معهم ... ناصر يوم شافها قال : راحوا النسوان عفاري ؟؟؟؟؟؟؟؟؟؟؟؟؟ بعد ما أشرت عفراء أنهم راحوا وهي تبتسم ... قال لها ناصر : ليه تضحكين ؟؟؟؟؟؟؟؟؟؟؟؟؟؟؟؟؟؟
عفراء قالت لعمها : لان خالتي بعد خمس ثواني بضبط بتذبح موضي .... ورفعت عفراء يدها تشر على الباب وهي تضحك بعد ما أسمعت صرخت خالتها ........................................




ااذا تحبون تحفة عطوني رايكم في الجزء اول ما تقرونه .... اختكم تحفة فينة .......

جود عرب فديتك مشكوووووره عالتكمله وخليك كذا لاتتاخري


اممممممممممممممواه

تحفه فنيه مشكووووووووووره عالقصه الرائعه

اشهد انك تحفــــه من قلب

وهالجزء حلوووو والله حبيت الشخصيات كلها وخاصه البرج هههههههههههه

بس عندي طلب صغيرون وادري انكم ماراح تردوووني

ياليت تنزلون القصه يوما او عالاقل كل يومين لانيبصراحه انلحس مخي من التاخيرلازم اراع الاحداث كل مره
وهذا حال اكثر الاعضاء

وياليت تنزلن جزئين عالاقل يابنت الاجوااد

وبنكون شااااكرين لك اذا مارديتيني ,,,فدييييييتك

مرحبا اختي المعضله .... اسمحيلي حبيبتي بس انا ما عندي القصة كامله لانها ما زالت الكاتبة تكتبها وانا انزل لكم كل جزء اول ما ينزل وهذا اللي اقدر عليه

مع خالص حبي

مسمووووحه حبيبتي بس لالاتتاخرون وبلغي تحيااتي لتحفه فنيه


تحيتي لك

تحفه فنيه مشكووووووووووره عالقصه الرائعه ,وإنتي فعلاً كاتبة مووووووووووهوبة وأنا أنتظر الباقي بفارغ الصبررررررررررررر ... وألففففففف تحية لك ولجود عرب .

[align=center]
مرحبا يا كل المتابعين للقصة ...اهديكم هذا الجزء الصغير ..... بس لاتقولون قصير لانه اصلا قصير ... يعني ما في داعي تعلموني




الجزء الرابــــــع عشـــــر :










ناص أول ما سمع صرخت فهده الثانية اقتحم الغرفة عليهم .... والبنات ورآه .... اصدمه المنظر اللي شافه .... فهده وموضي يتهادون فوق السرير ....ناصر قال يصرخ على موضي : جعلس تجدري يا مويضي دافع فيه ثلاثين ألف عشان أعرس عليه ... سويتيه حلبة مصارعة .... شوي و اسدحت فهده موضي .... صرخ ناصر : عاشت فهوده.. بعدي على أمرتي ..... وسكت يوم قلبت موضي فهده وبركت عليها ... وقال وهو يضحك : آفااااااا ... عفراء اللي كانت تضحك قالت : عمي فك بينهم .... ناصر لف يشوف عفراء والبنات اللي يضحكون وقال : والله أنا واحد أحافظ على كشختي .... وش يدخلني في هدت نسوان ... تبين روحي أنتي ... ادخلي حلبة المصارعة ... ذاك الطرق قدامس .........ولفوا كلهم على موضي اللي أقدرت فهده تسدحها وتبرك عليها وهي تصرخ وتقول : عمــــــــــــــي .... الحق علي .... أمرتك بتذبحني وأنا حامل ..أولدي بيموت ...الكل من سمع موضي ركضوا لها .... ناصر مسك فهده من خصرها وقام يجرها من فوق موضي ... وعفراء ومريم وريم يجرون موضي اللي استغلت أن عمها يجر فهده بقوة ودفتها عليه بالعاني ... خلتهم يطيحون فوق بعض على السرير .... وقامت تركض من تحتها وهي تصرخ : ما هب حامل ... لعبت عليكم ... ما هب حامل ... فهده اللي كانت طايحه في حضن ناصر وهو لام عليها .... من حرتها قامت تفكك عمرها منه عشان تلحق موضي وهي تصرخ: فكني ... فكني عليها قليلة الأدب ... ويوم ما قدرت تتخلص من يد ناصر قامت تشر وهي تقول لموضي اللي واقفة عند الباب وهي تضحك عليها قدام البنات : تعالي .... فيس خير ... تعالي هنا ... أنا اللي برويس يا قليلة الأدب ... وسكتت وهي تسمع ناصر يقول ...فهده حبيبتي صلي على النبي ... خليها عنس ... فهده لفت عليه وهي تقول : ذي ***ه يبيلها حد يدبها .... قليلة أدب ... تقول لي أنا ذا ألحكي ؟؟؟؟؟؟؟؟؟... أنــــــــــا ؟؟؟؟؟؟؟؟؟؟؟؟؟؟؟؟؟؟؟ فكني عليها خلني اذبحها .........ناصر شد يده عليها أكثر وهو يحاول انه ما يضحك وقال : زين هي وش هي قايلة لس؟؟؟؟؟؟؟؟ فهده قالت بسرعة وبعصبية وهي تلف مره ثانية عليه : تخيـــــــل ... تقولي بعلمس كيف يج....... وسكتت وهي تشوف ناصر كيف يشوفها وهو مبتسم .... لفت بسرعة على موضي اللي كانت قاعدة على الأرض وهي سكرانة من الضحك .... وتحاول تقول من بين ضحكها : تك ... تكفين ... علللللميه .... قوللللللي له .... أذا فيس خييييير قو... قولي ......فهده حست أنها بتموت من الإحراج والفشيلة .... وخاصة بعد ما شافت شكلها كيف هي قاعدة في حضن ناصر وكيف هو لام عليها بقوة في منظرة الكبت ...... فجأة تذكرت كلام موضي اللي قالته لها .... حست أن معدتها تحترق .... كانت تنقل نظرها من موضي اللي تضحك عليها ... إلى ... منظرة الكبت اللي عاكسه شكلها مع ناصر والحرقة كل ما لها وترتفع من معدتها إلى أن حست أنها بتنفجر ... كانت تتنفس بصعوبة وهي تضرب يد ناصر وتقول : فكني ... فكني ....بس ناصر ما فكها وهو يصرخ على موضي : يا الخبل طقي والله تجيس وتذبحس ... وسكت يوم فهد شمخت يده عشان يفكها وهي تصرخ : بزووووووووووووع ..... ناصر أول ما فكها ... طارت فهده للحمام ... والكل سمع صوتها وهي تزوع ..... ريم وعفراء اركضوا لخالتهم الحمام يشوفونها أم موضي فا انفجرت من الضحك مره ثانية وهي تقول : جااااااااااااااااات البنت .............























الكل تعشى في الصالة ألا محمد اللي جايه خويه وحطوا لهم العشا في المجلس الخارجي وفهده اللي كانت قاعدة معهم مجامله ولا هي قادرة تشوف شكل الأكل من اللوعة اللي تحس فيها كل ما تذكرت حكي موضي ..... ناصر بعد ما خلص عشا استغل فرصة أن البنات راحوا بيخترعون عصير في المطبخ الداخلي .... راح يقعد في الكرسي اللي جنب فهده ... مع انه بالعاني قاعدة بعيد عنه .... وقال لها بكل حنان وبصوت واطي : كيف حالس ذا الحين ؟؟؟؟؟ فهده اللي كانت حاطه حبة فاين على ثمها أشرت بيدها أشارة أحسن .... رجع قال ناصر بكل نعومة وهمس : روح قلبي ما تشوفين شر تبين اوديس المستشفى ؟؟؟؟.... فهده كانت تشوف ناصر بتتنيح وهي تحس أن الخدر بدا يسري في جسمها ..... كانت الفكرة الأخير في مخها قبل لا يوصله الخدر .... خاطري اعرف هو وش يقول ؟؟؟؟؟؟ بس الوقت ما ساعدها تلاقى الجواب لان عينها اشتبكت بعين ناصر اللي كان يشوفها بكل حنان وحب....في اللحظة اللي سيطر عليها الخدر ... وقف الوقت .... اختفى كل شيء من حوليها ... حست نفسها في فراغ وما فيه ألا عين ناصر ..كان حضور عينه في الفراغ اكبر من طاقتها .... حست بضغط على كل خلايا أعصابها ..ما كانت تقدر تتنفس ... كانت بتنخنق وتحاول تسحب اكبر قدر من الهوى وبسرعة .... بس فجأة عينه اختفت مع صوت موضي اللي كانت تقول : ذا الحين من قليلة الأدب اللي فينا؟؟؟؟ أنا ؟؟؟؟ ولا أنتي اللي شوي وتذوبين ؟؟؟ عيب عليس ذا الحركات قدام الناس ... لكن تدرين وش قومس ؟؟؟؟ قومس علب الورد حقت تالي الليل .... واللي سكت موضي هو علبة الفاين اللي أحذفتها فهده به على رأسها ..... وناصر اللي ضحك عليها بعد ما أضربتها فهده وبردت حرته فيها يوم خربت عليه الموقف .... موضي سوت نفسها تصيح وقامت تحلطم عليهم وتتفيقر .... وأول ما شافت عمها يطلع بوكها قالت بسرعة: لالالا ما أبي رضوه أصلا ما قبل ألا المبالغ المحترمة .... ناصر قال وهو يتمقت : و تبدي من كم المبالغ المحترمة عندس ؟؟؟؟؟؟؟؟؟؟؟
موضي قالت وهي شاقه الحلق : عشان خاطرك من خمس مية .... ولا غيرك من ألف .... ناصر طلع ألف من بوكه وقام يفرهم في الهوى قدام موضي اللي قالت بسرعة وهي تنط عشان تأخذها : رضيت وبالثلاثة ...... وقبل لا تأخذها ناصر جرها وقال : ما همني ارضاس .... قولي لي وش قلتي لفهوده وخليتيها كذا واخذي الألف حلال عليس ..........موضي على طول أبلعت ريقها بعد ما أسمعت طلب عمها وصرخت فهده عليها : والله العظيم اذبحس ..... ناصر بعد ما سمع فهده وش قالت طلع ألف جديدة وحطها مع الألف القبلية وهو يراوي موضي اللي لفت تشوف فهده بترجي ... خلت فهده ترد عليها باستغراب : آآآآآآآه يا قليلة الأدب صدق ؟؟؟؟ عادي ما يردس شيء ... سهلات مع الكل .... تدرين أنا ابغيس تقولين له .... أذا فيس خير قولي .... ويوم شافت وجه موضي تغير قالت لها وهي تبتسم بشماتة : ارجــــوس تقولين ....... موضي لفت على عمها وقالت : عمي تدري أني إنسانة مادية ... بس في ذا السالفة اسمحلي ... أن شاء الله استغلك في سالفة ثانية ... بروح أشوف العصير يمكن يبرد على قلبي حرت الألفين .......................






















موضي جاها رجلها وراحت حتى قبل لا تشرب العصير .... ناصر كان شمتان فيها وقعد يضحك عليها ويقلد شكلها للبنات وهو حاط مها في حضنه ويشربها من عصيره .... فجأة لف ناصر على مريم وقال : مريوم البضاعة اللي جايبتها معاس رقديها اليوم معاس ... ما هب أجي وألقاها مكاني في الفراش ... مريم اللي أعرفت أن عمها يتكلم عن مها قالت تغلس على عمها : عمي ذا الحين أنت ماسك البضاعة طول اليوم وتبزيها ... ثقلت عليك في النوم ؟؟؟؟؟؟؟؟؟؟؟؟؟؟؟؟؟ فهده سبق ردها رد ناصر يوم قالت : البضاعة أمانه عندي ولا هي براقدة غير في حضني .... ناصر شاف فهده وهو يقرص عينه فيها وقال : يا بنت الحلال ما لس حاجة فيها .... طيعيني ...لا تقولين بعدين ما قلت لس .... فهده اللي كانت متضايقة من نفسها ومن ناصر خاصة بعد تعليق موضي يوم قالت عنها أنها شوي وتذوب ... ردت عليه بحده وهي تقول : أنت اللي ما يدخلك في ذا السالفة .... ولو سمحت انتهينا من الموضوع .... ناصر ما أعجبته فتنت فهده عليه قدام البنات ... كان وده يقوم ويلتها كف يعلمها الأدب ... بس قرر انه يعاقبها بطريقة ثانية .... دنق على مها اللي قاعدة في حضنه ولا تدري وين الله حاطها وقال : مهاوي حبيبتي أنتي ... وين بترقدين اليوم ؟؟؟؟ لا تقولين مع مريوم ... مريوم ما نحبها ... مها أرفعت رأسها له وقالت بصوت واطي : أنا ابغي ارقد عندك .... أنت حبيبي ... ناصر أول ما سمع ضحك البنات عليه لف عليهم وهو يقرص عينه فيهم وقال : وأنا بعد احبس .... بس والله محزن عليس انس بتعنسين .... بعد هذي الجملة الكل لف يشوف ناصر حتى فهده وهم يسمعون عفراء تقول : حرام عليك عمي ليه تقول كذا ؟؟؟؟ لا تفاول على البنت .... ناصر قال وهو يقوم ويحط مها في حضن فهده عشانه بيروح المجلس لمحمد وخويه : أقول كذا لأنها كل ما أرقدت عندي تأخر رجلها لا يجي .. وغمز لفهده .... اللي حست أن حد عطاها بكس بين عيونها ووجها صار كرتون طماط من الإحراج .... كانت تبي تصرخ عليه وتقول له ... انه اكبر وقح ومنحل وقليل أدب شافته في حياتها .... بس ما أقدرت خاصة بعد ما شافت أن البنات ما فهموا وش السالفة .... خافت تتحاكا ويفهمون .... قررت أنها تسكت ذا الحين وتتفاهم معه بعدين ....

























ناصر اللي راح يقعد مع محمد وخويه ... بعد ما راح خوي محمد راحوا الملحق وقعد ناصر مع محمد يسولف شوي ... وعلى الساعة 12 وربع رجع البيت داخل ..... أول ما دخل الصالة قفل الباب ورآه .. وقف في الصالة شوي وهو يتذكر فتنت فهده عليها اللي ما بردت حرتها إلى ذا الحين وهو يشوف كرسيها اللي كانت قاعدة عليه .... رفع عينه لباب الممر وهو يبتسم ..فتح الباب ودخل غرفة القعدة .. وطلع منها بسرعة وراح يركب الدرج للبنات ....شاف مريم وريم قاعدين على ألنت في الصالة ......
ناصر وهو يقعد قال : وش تسون ؟؟؟؟؟؟؟؟؟؟؟؟؟؟
ريم : ننطر جزء جديدة من القصة بينزل اليوم .....
ناصر قال وهو يبتسم : ارب ما هب راعي الرنج ؟؟؟؟؟؟؟؟؟؟؟؟؟؟؟؟؟؟
مريم : ما غيره .... لا يفوتك عمي القصة تجنن ....ناصر قطعها وهو يقول : هذي قصص بزران أنا ما أقرا ... ذا الخرابيط ....مريم قالت تحتج : لو هي قصص بزران كان أمرتك ما قرتها ؟؟؟؟؟؟؟ ناصر قال عشن يغايض مريم : أمرتي تقراها عشان تسوي عليكم رقابه .... نطت ريم في ألحكي وقالت : ألا والله تقراها عشانها تموت على راشد ... وحركات راشد ... وقامت تقلد خالتها وهي تقول
: صدق رجال ... ناصر اللي قلب ألمود عنده فجأة قال وهو يقوم : عفاري وين ؟؟؟؟؟؟؟؟
ريم قالت : راقدة من زمان ..... ناصر قال وهو يلف عشان ينزل : انتووا بعد لا تاخرون روحوا ارقدوا ..... وأول ما وصل الدرج وقف شوي ... ورجع يلف عليهم وقال : ريموه ... متى بينزل الجزء ؟؟؟
ريم قالت : ما ادري بس المفروض ذا الليل ... بس ليه تسال ؟؟؟؟؟؟؟؟؟؟؟؟؟؟؟؟ ناصر قال بعياره : اسمعوا وش رأيكم تجون تقعدون عندي في غرفة السوني وإذا نزل الجزء قبل لا أنام بجي أقراه معكم ....البنات أعجبتهم الفكرة أنهم بيسهرون مع عمهم ... شلوا جهازهم وانزلوا تحت مع عمهم .... اللي دخلهم بنفسه في غرفة السوني وقال لهم : شوفوا لا أشوف وجه وحده منكم عندي في غرفتي ... أنا من نفسي إذا ما جاني نوم بجيكم .... فهمتوا ولا أعيد ؟؟؟؟؟؟؟؟؟؟؟ريم قالت : يعني ما هب سهران معنا اجل ليه نازلين تحت وأنت ما هب قاعد معنا .... ناصر رد عليها : عشان أذا قعدتوا بروحكم احاتيكم ... لكن لا عادكم جنبي بتخافون مني ولا بتدخلون مواقع أي كلام ............وطلع وسكر الباب

























فهده اللي كانت فرحانة أن مها بتنام عندها لأنها تحب البزران واجد .... قررت اليوم تلبس بجامة حرير خاصة أنها أتعبت من كثر ما تلبس قلابيات للنوم من يوم ما أعرست .... قالت البرج مستحيل يتجرا يقرب مني أو يسوي أي حركة سخيفة من حركاتها ومها موجودة عندي .... عشان كذا كانت مرتاحة ولا توترت وهي تسمع الباب ينفتح ... ناصر دخل الغرفة وهو يبتسم .... ما فتح الليت لان فهده كانت فاتحة الابجورة عشان مها تخاف من الظلام .... وقف يشوف فهده اللي كانت منسدحه وهي لامه مها ومغمضه عينها ... راقدة ؟؟؟؟ ولا تتريقدين ولا تبين تشوفيني ؟؟؟؟ بعرف ذا الحين ؟؟؟؟؟؟ فهده كانت تسمع ناصر وهو يدخل ويطلع من الحمام وكانت تنطر متى يطلع من الغرفة عشان تتنفس بارتياح ....بس أول ما حست بطرف الملحف يرتفع أرفعت رأسها بسرعة وشافت ناصر يقعد على السرير وهو يتلحف ... قالت له بسرعة وهي تجر الملحف عنه : خير ؟؟؟؟ وش اللي جايبك هنا ؟؟؟ أنت ما تستحي على وجهك ... قوم اطلع برى ... برى .......... ناصر اللي خاف أن صوت فهده يوصل للبنات اللي في غرفة السوني قال بكل برود وهدوء وهو يجر يد فهده اللي ماسكه بها طرف الملحف : لو سمحتي لا تعلين صوتس البنت راقدة تصبين قلبها ....وبعدين ألسانس العسل هذا بقصه بيدي لو تطولينه علي مره ثانية ... احترمني واحشمنيني أنا رجلس ما هب اصغر عيالس عشان تفتنين علي قدام البنات ......أقطعته فهده وهي تصر على ضروسها عشان ما يعلى صوتها وتقوم البنت : والله الناس تحترم اللي يحترم نفسه ... وأنت واحد قليل أدب أي شيء يضرب في راسك المريض تقوله وتسويه ... ما تفكر أن اللي قدامك بنات ومراهقات .... ما تفكر انه عيب عليك ذا الحركات ... ما تفكر أن اللي قاعد تسوي فيها ذا الحركات لايعه كبدها منك ومن تصرفاتك الوقحة ... ما ادري متى بتعقل وتصير رجال صدق ... فك يدي كسرتها ..... ناصر كان يسمع فهده وهي تقول ذا ألحكي اللي كان متوقعه ومتجهز له ... بس صورت وجها وهي تقوله طيرت كل ألحكي اللي مجهزه كانت تتحاكا بكل اشمئزاز وقرف واللي كمل عليه هو سؤالها له ... متى بتصير رجال صدق ؟؟؟؟؟؟؟؟ دخل في قلبه الخوف ... بلع ريقه .... بداء الخوف يسيطر عليه .... قرر أن الهجوم أفضل وسيلة لدفاع ... دف يدها بكل قوته وهو يقول ببروده المعتاد : أنا رجال غصب عنس وعن طوايفس .... واللي خلاني أجي وارقد اليوم هنا سببين أولهم هو مها .... البنت قالت تبي تنام عندي واعتقد أن من الطبيعي أن يكون مكاني هنا وعلى ذا السرير.... فهده ردت عليه بسرعة : صحيح أنا عيت ترقد عندك وقلت أبيها ترقد عندي أنا ... بس هذا ما هب معناه انك تجي ترقد هنا؟؟؟؟؟؟ ناصر قطعها وقال باستهزاء : إذا نسيتي أحب اذكرس ترى أن قلت لس في الصالة ما لس حاجة في البنت.... وأنتي اللي عييتي .... وسواء نامت عندس أو عندي النتيجة وحده لان المفروض أن يكون مكانا الطبيعي لنوم قدام البزر وقدام الكل هو ذا السرير في ذي الغرفة .... ولما شاف ناصر فهده ما هب قادرة ترد عليه كمل حكيه وقال .... أما السبب الثاني اللي خلاني أجي هنا إذا تحبين تعرفينه ... هو أني جيت ولقيت البنات ينطروني في الصالة عشان يبون يلعبون سوني على التلفزيون الكبير ... وش كنتي تبيني أقول لهم لا والله ما اقدر أخليكم تلعبون هناك عشان أنا ارقد هناك ؟؟؟؟؟؟؟؟؟؟؟؟؟ لف ناصر يعطي فهده ظهره وهو يجر الملحف عشان ينام وقال : هذا واقع الموقف اللي حنا فيه ... عاد اعجبس ما اعجبس أنتي حره ... بس نصيحتي لس ... تقبلي الواقع .... لان الرجال الصدق اللي تدورينه ما هب موجود غير في القصص والراويات ... فهده اللي كانت تأكل شفايفها من الحرة عليه وعلى نفسها خاصة بعد ما قدر يقلب الطاولة عليها ويقلب الموقف كله لمصلحته .... كانت تحس أن دمها يغلي في عروقها غلي .... وتحاول أنها تفكر في شيء أو عذر عشان تطرده من الغرفة ... أصدمتها نصيحته اللي قالها .... وخلتها تشوفه وهي فاتحه ثمها .... وش يقصد ؟؟؟؟؟؟؟؟ من الرجال اللي أدوره ؟؟؟؟؟؟؟ وش سالفة القصص والراويات ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟






























فهده اللي ما أقدرت ترقد طول الليل وهي قاعدة على حيلها وحتى يوم تعبت وحاولت تنسدح كانت عينها على ظهر ناصر اللي ما تحرك من مكانه طول الوقت .... هو مجرد وجوده معها في الغرفة يوترها كيف وهو نايم جنبها على السرير .... جرت مها الرقدة تقربها منها .....تحاول تستمد منها شعور بالأمان ..... ليه أنتي سلبية كذا ؟؟؟؟ اطرديه قولي أي شيء خليه يطلع ... تدرين اصرخي عليه واحشريه .... كيف اصرخ عليه والبنت اللي بينا راقدة اصب قلبها وأفزعها ؟؟؟؟ ولا البنات اللي قاعدين في الغرفة اللي جنبنا ؟؟؟؟ إذا اسمعوا صراخي وش بيقولون ؟؟؟؟ أصلا أنا ما فيني صوت اصرخ راسي يوجعني وابغي ارقد .... يعني ويش ؟؟؟؟ بتمشينها له كذا ؟؟؟؟ سهلات ؟؟؟؟؟ شافت ناصر يجر الملحف عليه عشان يغطي يده بس بدون ما يتحرك أو يلف عليها .... أنتي ليه شاله همه ؟؟؟؟ وهو ما جاب خبرس ؟؟؟؟ حط رأسه وراح في سابع نومه .... لو هو في باله شيء كان ما رقد .... هو حتى ما يشوفس ... راقد وما عطيس ظهره ..... ارقدي ابرك لس .... ما اقدر والله وما اقدر .... ما اقدر ارقد وهو هنا .... لكن وش ذا السالفة الجديدة ؟؟؟؟ من هو الرجال اللي أدوره ؟؟؟؟ وش يقصد؟؟؟؟؟؟؟؟؟ يقصد أني ابتعد عنه عشان أنا اعرف واحد ؟؟؟؟؟ يهبي ألا هو أسود الوجه ... أنا اشرف منه ومن طوايفه كلهم .... بس ليه قال في القصص والراويات ؟؟؟؟ وش دخل ذا في ذا .؟؟؟؟ صدق أن مخه ضارب ... الظاهر ما هب عرقين بس اللي ما هب راكبين على بعض .... الظاهر كل العروق .................................................. ..................
























ناصر من حط رأسه على الوسادة وهو يفكر والأفكار تأخذه وتجيبه ...... ليه دايم لعادها بالحالها معي تقول كبدي لايعه علي منك ؟؟؟؟؟ تتخيلني عزوز ولا ؟؟؟؟؟؟؟؟؟ معقول تذكر ؟؟؟؟؟؟؟؟ بس منيرة تقول أنها ما تذكر شيء ؟؟؟؟؟ اجل ليه ما تطيق لمستي لها غير بين الناس وبالحالنا تنفر مني وتستقرف مني ؟؟؟؟؟؟؟؟ يمكن إلى ذا الحين تشوف عزوز فيك ؟؟؟؟ ويمكن ذي طريقتها في التعبير عن خجلها وحياها من وجودك معها بالحالكم ؟؟؟؟ ويمكن تذكر كل شيء وما تبي تتكلم ؟؟؟؟؟؟؟؟؟ لا..لا..لا ما أظن وحده مثل فهده تذكر إذا الشيء تقبل حتى تشوف وجهك .... كيف تقبل بك رجل ؟؟؟؟؟ زين وش اللي يخليها تسال ذا السؤال ؟؟؟؟ ليه تقول متى بتصير رجال صدق ؟؟؟؟؟ وش تقصد منه ؟؟؟؟ تقصد ما هب رجال بعد اللي سويته ؟؟؟؟؟ ولا هي كانت تتمنى تأخذ واحد بموصفات معينه ما هب موجودة فيني وعشان كذا ما تعتبرني رجال في نظرها ؟؟؟؟؟؟؟؟؟؟؟؟ ليه لا.... هي بنت مثل باقي البنات ومن حقها أنها تحلم وتتخيل ؟؟؟؟؟ لا فهده ما هب خيالية .... غير كل من ذا الخرابيط اللي تقراها ... الله يأخذ راشد واللي كتب راشد .....وجر الملحف على يده وهو يفكر .... أنت ذا الحين خلك على تخطيطك و شوف إلى وين بتوصل معها ..... بس أنا لازم اعرف وش سالفة راشد ذا اللي تشوفه رجال صدق .............................

























لا فهده ولا ناصر رغم تمثيلهم اقدروا أنهم يرقدون في ذا الليلة ..... وكان فرج رب العالمين عليهم أن أذن الفجر ....لأنه ما كان يبي يطلع من الغرفة بدون سبب ويبين لها انه رضخ لطلبها حتى بعد ما سمع البنات يطلعون ويسكرون باب الممر ورآهم .... أما فهده فكانت تبي تبن نفسها الشجاعه والقوية اللي ما يهمه مية رجال ... كيف واحد ؟؟؟؟ ناصر على طول فز وراح يتوضى عشان يروح يصلي في المسجد ..... فهده كانت تتريقد عشان تنطره يطلع ...... بعد ما طلع ناصر قامت عشان تصلي ورجعت ترقد جنب مها أو تتريقد ...لان شكل ذا الطريقة أنفعت معه .... لأنه لا تحاكا معها ولا افتكر فيها ومها عندها ...... بدت تحس برجفة وهي تسمع صوت باب الممر ينفتح و يتسكر .... واللي صدمها هو صوت باب غرفة السوني اللي يتسكر .... ما تدري ليه بس حست بشعور غريب من الضيق والارتياح .... بس مع ذا الشعور قدرت أنها تروح في نوم عميق وعميق جداً لدرجة أنها ما حست بناصر اللي دخل الغرفة الساعة سبع عشان يتسبح ويلبس ويروح الشغل اللي صار له كم يوم ما راح له خاصة أن حمد اللي معتمد عليه في كل شيء مسافر .....ولا حست بمها اللي قامت متعومسه وتبكي تدور أمها واللي سكتها ناصر وقعدها في الصالة مع سونيا في الصالة اللي تحت تشوف سبيس تون إلى أن تقعد فهده اللي ما كان يبيها تقعد قبل لا ينفذ خطته ...... طل على مها اللي قاعدة في الصالة مع سونيا وسكر باب الممر وراح غرفة القعدة اللي كان خاش فيها الوردة الجورية اللي اشتراها لفهده البارح فليل عشان يعطيها أيها اليوم .... كان معلق فيها بطاقة صغيرة كاتب عليها ......


(( ليه إذا حبيتك أكثر زدت قسوة
وان عطيتك من حياتي ما تريده
ما كفاك وتحسب أن الحب نزوة
والله أني يا أحب الناس.. أحبك
والله أن الروح لو ترضيك فدوة ))

شم الوردة وعدل البطاقة وفتح باب غرفة النوم شوي شوي عشان يحط الوردة لفهده على الوسادة .... دخل وسكر الباب .... بس أول ما شاف فهده أنصدم ووقف في مكانه ...... فهده كانت نايمة على بطنها وطرف الملحف اللي كان مغطيها مع لفتها جاء تحتها ..... أعجبه شكلها وهي نايمة بالبجامة واللي أعجبه أكثر أن قميص البجامة اللي أصلا قصير كان مرتفع إلى نص ظهرها وكاشفه ... والي أحلا وأحلا انه راقدة يعني بيشوف على راحته .... قعد على السرير وحط الوردة على الوسادة ولف عشان يقوم ويروح .... فرحان واجد بالشوف ؟؟؟؟؟؟؟؟؟؟ وش استفدت ؟؟؟؟ شوف وحرق جوف ؟؟؟؟ لف ناصر يشوف فهده مرة ثانية .... هذي فرصتك مها برى والبنات راقدين .... لا لا ما أبي أخرب تخطيطي ..... تخطيطك وش بينفعك سبع سنين ثانية ..... وسبعين سنه بعد.... بس ما يتكرر اللي صار ... اللي صار صار من زمان لكن ذا الحين هي أمرتك وحلالك .... حلالك ... حلالك .... سيطرت ذا الفكرة على ناصر وقدر الشيطان يلعب في عقله .....قام بكل هدوء وقفل الباب ... و فصخ غترته وحطه على الكرسي .... وأول ما أشاف فهده بتتحرك راح بسرعة وقعد على السرير ومد يده يجهزها عشان يحطها على ثمها إذا حاولت تصرخ لو شافته .... بس فهده اللي لفت على جنب كانت راقدة ولا حاسة بشيء من اللي يصير حوليها في صمت .... ناصر اللي كان ما زال ماد يده قدام ثمها أول ما لمح اثر العملية اللي في خاصرة فهده اللي كاشفته البجامة ..... حس أن في حد عطاه كف وعاه .... لف يشوف يده اللي مادها قدام ثمها .... مات من الخوف ........ أنت وش قاعد تسوي ؟؟؟؟؟؟؟؟؟؟ تعيد اللي صار بكل تفاصيله ....لا ... لا........لالالالالالالالالالالالالالالالا .... قام بسرعة وطلع من الغرفة بعد ما اخذ غترته .........................................



بس بليييييييييييييييييييييييز ان ابغي الرد على طول اول ما تخلصون من قراءة الجزء

اختكم تحفة فنية .......... [/align]...

مرررحبا تحفه فنيه وجود عرب

مشكككووووووره يالغلا ماقصرتي صح قصير بس العوض ولا القطيعه ههههههههه

جعل الكتاب كلهم فدوة لك,,


مع حبي

الله يخليكم باقي القصه بسرعه بلييييييييييييييييييييييييززز
ننتظر بأحر من الجمر بسرعه أختي تحفة فنية ومشكورين يا جود عرب

السلام عليكم

هذا اناجيت بعد ماقريت الجزء وكالعاااده حلووووو

وتحمست معاه كثير والله متلهفه للتكمله ابي اعرف شصار,,,

لوسمحتي تحفه فنيه اذا كل يوم بتنزلين جزء قصير من غير تاخير مثل ليوم بنكون شاكرين لك

وبدوووون مجاملات هذي احلى قصه قريتها ولا احلى منها الا الكاتبه


مشكووووره جود عرب

القصة حلوة مووووووووووووووووووت والله انها عاجبتني بس ياليت ماتتاخرين علينا
ومشالله عليج وعلى اسلوبج دووووووووووووووووخني
وشكرا ياجود عرب

مشكوررررررررررررررررين على هذا الجزءءءءءءءء ونننننننننننتظر بأحر من الجمرررررررررررررر التكملة وألففففففففففففف تحيةأختي تحفة فنية و جود عرب